مضيّعه .. شاعر .. حدش يعرف مكانه يا قماعه !!

أخواني ..

احد يعرف من هالشاعر اللي كان يكتب بإسم ( ذهب ) من زمااااان ..
من 2002 تقريباً
لي فترة طويلة أدور أقراله شي لكن عجزت وين ألقاه

أقسم بالله هنا الشعر على كيف كيفكم .. !!








( جسدت كل المواجع لحظة ٍ تدعى الرحيل )



هيضتني بنوحها في دوحها عقب الهديل
.............. وكم تباريح الحزن حتى على الورقا اليمه

بنبرة الصوت الشجي قامت تهل وتستهيل
.............. مدمع ٍ ياما تعاطف مع ندا قلوب ٍ رحيمه

كانت تناغي لها ولف ٍ تحت ظل ٍ ظليل
............... قبل ما الصياد يرمي ولفها بابشع جريمه

طاح ما بين الغصون ودمه الطاهر يسيل
.................. ما بقى عقبه حياة ولا بقى للروح قيمه

ما منعها لا تموت إلا صغار ٍ تستطيل
.............. عمرها يا كيف تترك خلفها فروخ ٍ يتيمه

يا شعر ما اظن تقواها فهل لي من بديل
.............. طالبك ياشعر لا تبخل ولو جبت الزعيمه

ما بخلت ابدا ً عليك فلا تكون انت البخيل
.............. جيتك استمطر مواسمك الجديده والقديمه

ما يشيلن القصايد ياشعر شي ٍ نشيل
.............. الحمل أعظم ولو حتى على ذيك العظيمه

ويوم كر الخيل يظهر فيهن المهر الاصيل
............... مقبل ٍ بركان هادر مقفي ٍ مثل الصتيمه

كن له راسين وله ذيل ٍ هنا وهناك ذيل
............. لابترام اربع جهات الكون تصبح مبتريمه

كم قصايد من ذوات الجاه والمجد السليل
................ حاولت لكن أخيرا ً قررت تبقى حكيمه

عودت تحمل لها مما لقت شي ٍ قليل
.............. وتحمد الله راضيه لو بالاياب من الغنيمه

الجميل اليوم كانك تنتظر رد الجميل
.......... يا رفيق الدرب جاك الصوت ياشين الظليمه

الضرورة قد تحـل اللي محــرم بالدليل
............... ولو تموتنا الضروره ما استحلينا لشيمه

خابرك ما تعترف في منطقك بالمستحيل
........... وخابرك ماتعترف في منطقك بإسم الهزيمه

جيت لك زابن وخلفي جيش صبح وجيش ليل
............ وكل ما قلت ادركوني استجابت لي عزيمه

قبل جياتي ترا كانت كما عابر سبيل
............... بس هالمره تراني ناصب ٍ فالريع خيمه

أقشر انواع البيوع اللي حشف مع سو كيل
............ واقشر انواع الشعر شعر ٍ يخاطب للبهيمه

وجسدت كل المواجع لحظة ٍ تدعى الرحيل
........... وخربوا صفو الحياة اهل الدسايس والنميمه

لو تغنيت بجديل ان كان رقصت الجديل
.............. ولو تغنيت بجبل كان الجبل تسمع حميمه

يا حروف الغي لاتلفين ماني لك عميل
.............. واتركي بيض النوايا مثل ما كانت سليمه








( انت واهم يا شعر والا نسيت اني هذاك )


وش دهاك الليل ذا يا شعر قل لي وش دهاك
-------------- جيتك استرفد عطاك وقمت تعطيني فراطه

كان هذي مدّ تك يا شعر رح عني وراك
---------------- ولا تعيبط يا شعر والله لاوريك العباطه

لعنبو دارك تراني دايما ً ادمح خطاك
-------------- بس اشوف انك تماديت بمسار الانحطاطه

انت واهم يا شعر والا نسيت اني هذاك
------------------- الذي ما هوب يقبلها كذا بكل البساطه

شاعر ٍ ياشعر لامنه بغى ليّـك لواك
-------------- وان بغى جاء درة التاج وقلبها لك طماطه

مع مجانين الشعر اطلق جنونه في سماك
------------------ مثل ما عاقل بني مرّه ايلا قطع رباطه

وصارت العله هنا وانا احسب العله هناك
-------------- وشط بك حتى عجزت تواكبه فالانشطاطه

عاذرك ان كان هذا كل ما ربي عطاك
------------ جبت ما فوق النجوم وجبت ما تحت البلاطه

بس اخيرا ً اكتشفت ان البلا يعجز مداك
------------- لا يحيط بوحدة ٍ كم حطمت معنى الاحاطه

قلت انا باعـاود الكـرّه وقال الله معـاك
-------------- اما انا اعذرني وقفـّا ما طوى حتى بساطه






( الشعر ما هوب كوره وْ لا يقرّ الاحتراف )


لعنبو ذا الذيب حتى نومته فيها اختلاف
_ _ _ _ _ _ _ إن رقد يرقد بعين وعين تتولى الحراسه


من حذر والا الذيابه لو تغمض ما تخاف
_ _ _ _ _ _ _ والحذر قالوا هو اول وآخر فنون السياسه


وان رثع ذيب ً لقاها في نهايات المطاف
_ _ _ _ _ _ _ وما رثع ذيب ً عبث والا تركها من أساسه


إن ركبنا فوق عجلات ٍ سرن ليل ٍ خفاف
_ _ _ _ _ _ _ _ _ ما ركبناها ندوّر في مسارينا طفاسه


كل بحر ٍ له ضفافه والشعر ما له ضفاف
_ _ _ _ _ _ _ وكل شي ٍ ينقدر الا الشعر صعب ٍ مراسه


قالها الي لاسرى ما لدت عيونه خلاف
_ _ _ _ _ __ _ سرية ٍ يعقد لها ما هيب سريات الوناسه


من يسلم لي على الي زابن ٍ تحت اللحاف
_ _ _ _ _ _ _ _ ما درا رجليه تظهر يومه مغطي لراسه


يا جفاف ٍ ملتحف مثله جفاف ٍ في جفاف
_ _ _ _ _ _ _ _ _ تنبل و كمبل تكامل منظر ٍ كله تعاسه


ومسكنه أردى بيوت الشعر والعيشه كفاف
_ _ _ _ _ _ _ وما يخلي رغم هالعيشه اساليب النجاسه


كالمضاف اليه دايم تابع ٍ حال المضاف
_ _ _ _ _ _ ما يعيش الا بمضافه من ردى أصله وساسه


نعرف الخايب ولو جاء لابس ٍ ثوب العفاف
_ _ _ _ _ _ _ ولو تزيا وادعى إنه من اصحاب القداسه


المرض كانه يعالج سهل لو كان انحراف
_ _ _ _ _ _ _ البلا كان المرض في طينة ٍ فيها خساسه


انثنا ضعف ومهانه قلت يا مال الضعاف
_ _ _ _ _ _ ما اشين الي يلبس لثوب ٍ وهو ماهو مقاسه


الشعر ما هوب كوره ولا يقر الاحتراف
_ _ _ _ _ _ _ _الشعر من خلقته معروف من اهله وناسه







( قالت الله ! بس كفايه وحذفت عندي حصاه )


ناوشوني هالقلم واشوية اوراق ودواه
................ واطلعوا عني وخلوني بها الغرفه وحيد

كان تبغون المعاني فاسمعوها يالرواه
.......... وكان تبغون القصايد فاسمعوا هجس القصيد

ويل قلبي يوم اشوف الشعر ملعون ٍ ثواه
................. عجزت الشعار لا تمزج قديم ٍ مع جديد

واحد ٍ يكتب بأسلوب القرون اللي وراه
................... و واحد ٍ يكتب بابهام ٍ ولا معنى مفيد

والشعر كالطير واللي يجهل الصقر اشتواه
................... وطير ما والف لصقاره فلا والله يصيد

كالحباري هالبيوت وهالقصيده كالمهاه
.................. مستـذيره في مراتعها وتجفل من بعيد

ما يصيد البيت من يحذف على بيته عصاه
................. ولا يحبك الخطه المثلى ترا الراس البليد

وقالوا ان الذيب ما خاشر لذيب ٍ في عشاه
..................... كل ذيب ٍ يشبعه نابه ويترك ما يزيد

سامريني ياحروف ٍ ليلها ضيع مداه
.................. استطال الليل والمعنى لمرسولي زهيد

اتلحف لي سوادة ليل واسري في فلاه
...................... ليل في ليل ٍ وبيد ٍ خلفها ليل ٍ وبيد

ما كفاه الهاجس الثاير مداها ما كفاه
.................... كل ما قال المدى حدّي تعدا يستزيد

وتستهيم المهجة اللي روحت تتبع خطاه
............... في اثر نفح يفوح لمدخل القصر المشيد

اثر يوجد مملكه للزين وحراس وقضاه
........... حاكموا لي هاجس ٍ يجمع من النسمه نشيد

لبسوني تهمة الاجرام في صك ٍ تلاه
................ اكبر الحراس والسيـّـاف مجنون ٍ شديد

ادركتني رحمة ٍ من سيدة قصر الصفاه
............ والا كان الشعر يبكي له على شاعر شهيد

قالت اعفوعنك شرط تجيب لي بيت ٍ صداه
................. لاسمعته تلني من هالوريد لها الوريد

وتستميل الخاطر وتلوي ذراع الشعر ياااه
.......... كيف طوعت الشعر وحدك وهو راسه عنيد

واترك احداث الشعر وانظر لبدر ٍ في سماه
.................. و اتفكــّـر ثم اردّ د يفعل الله ما يريد

يانبعاث النور يا صبح الاماني يانداه
................ ياوحيد الشعر يا نبض القوافي يالفريد

يامثار السالفه يا اجمل سوالف منتقاه
................. يافواح العبق كله يا ابتسامات الوليد

يا مرام الهاجس اللي لا عداك ولا عداه
............ التوى بك لين صرت القيد وصار القيد قيد

الله المعطي وانشهد يوم قسمها عطاه
................ كن لا قالوا عبيد الله ماهيب من العبيد

قالت الله ! بس كفايه وحذفت عندي حصاه
................ وكل شي ٍ فيه تفسيره وله معنى اكيد







( بس انا باقي بعدني ما طحنتك يا حصاتي )


ما بدت عندي قصيدة بسادتي او سيداتي
_ _ _ _ _ _ ولو بداها الشعر عندي كان والله لظربه

و حر انا وشلون الحن او اغني اغنياتي
_ _ _ _ _ _ _ وكل انسان ٍ بعد حر ٍ ويسمع مطربه

كانت اول تجربه اكتب قصيدة في حياتي
_ _ _ _ بس مدري عن نجاح او عن فشل هالتجربه

كنت انا امسك للقلم وانساق معها سوق ذاتي
_ _ _ _ _ _ _ رغم ناس ٍ حذروني هالشعر لا تقربه

بس انا باقي بعدني ما طحنتك يا حصاتي
_ _ _ _ _ ولازم اطحن هالحصاة ودمها غير اشربه

كم سريت بليل شعر ٍ ما علي الا عباتي
_ _ _ _ _ وكم وطيت لداب دربي وكم وطيت لعقربه

عارف ٍ لايمكن يحقق جلوسي امنياتي
_ _ _ _ _ _ اغترب في بلاد شعري ثم أعوّد باغربه

الدواوير اللي بلا اطراف هذي دايراتي
_ _ _ _ _ _ _ الشعر حولي وضعها شايكه ومكهربه

الشعر لااخفى لسره حط سره في دواتي
_ _ _ _ _ ويبعد المعنى وغيري يحسب انه ما اقربه

الشعر واجد ولكن خايفٍ اتعب رواتي
_ _ _ _ _ _ ويا كبر سر الشعر مع شاعرٍ ما سربه

هالقمر وطويق وسهيل الحضور لامسياتي
_ _ _ _ _ _ واطلق عنان الجواد الشاعري وادربه

ان عدا يرسم بعديه لوحته مع ملهماتي
_ _ _ _ ومضة شهاب ٍ هوى من مشرقه في مغربه

وان وقف فالمنتصف ناديت وينك يا ثباتي
_ _ _ _ _ _ في شموخه في ثباته لا وقف من يقربه

القصايد بعضها كم شققت صدري ولهاتي
_ _ _ _ _ _ واتوقف كان جاء شي لمزاجي وخربه








( الشعر يبقى سلاح ٍ قاتل ٍ ما ينلعبه )


فيه بيت ٍ ما يساوي حبره اللي ينكتبه
.................... وفيه بيت ٍ والله تشد الرحال وينعنا له

وفيه بيت ٍ كل من يقــراه فالدنيا يسبه
................ وفيه بيت ٍ من قراه استغفر الله من جماله

ويعرف الانسان ربه والشعر يعرف لربه
................. رغم تتأرجح نواياهم على هدي وضلاله

وفيه امور ٍ واجبات وفيه امور ٍ مستحبه
........... ومن خلط بين الامور ادخل حرامه في حلاله

والشعر يبقى سلاح ٍ قاتل ٍ ما ينلعبه
.................. ولا يسلم في يدين اللي بدت فيهم جهاله

وان دخلت بغبته والله دخلت ببطن غبه
............ وان رقيت اعلى جبل قامت تطاول لك جباله

والشعر ما هوب طير ٍ يالف انسان ٍ يحبه
............... الشعر متوحش الاطباع ويجفل من ظلاله

لي ثلاث سنين الاوح له بملواحي واذبه
.............. وله ثلاث سنين طير الشعر حايم في مجاله

ومن عشق قلبي تنشا هالسحاب اللي يصبه
................ وحول الطير ولقا عندي اثر ذيك الغزاله

وصار يفرد له جناح ٍ كل ما وافاه هبه
................... حلق يتابع مسار الشاعر ويطرد خياله

طار من خلف المسا حتى توارى واحتجبه
.................. هبة ٍ ساقت عيونه بين ممكن واستحاله

وما يزال الطير يسعى واعتقد انه نشبه
.................... كل ما قرب تباعد لا قواه ولا استماله

انتبه لابعدت قالوا فالهوا العالي مطبه
.................. قال لا توصي خبير ٍ قد عقد فيها حباله

دامها تستاهل الروحه على سبعين سبه
............... ودامها يا شيب عين الشعر ما تطلب تناله

ليت لي الفين ريشة رسم وارسمها وانبه
............ من نوى ينظر تكون النظره بسرق وعجاله

قد تجي ردة فعل نظره لصدره ثم تشبه
............... وهي على لوحة خيالي كيف لو يقعد قباله

ما نجيب اطراف علم نجيب اطرافه ولبه
................... ولا ندور فالشعر الا على نبع الاصاله

من يحاول ترك طبعه قيل طبعه ما يكبه
................... ولا يغير لو يحاول طبع ٍ بطبع ٍ بداله

موضوع رائع بالتوفيق

شكرا جزيلا على الموضوع الرائع

طرح مميز

شكرا على الموضوع و على الجهد المبدول

بارك الله فيك

شكرا جزيلا على الموضوع الرائع

طرح مميز

شكرا على الموضوع و على الجهد المبدول

بارك الله فيك

مشكور يسلموووووووو